ରାଜଧାନୀରେ ନିଆରା ଗଜଲକ୍ଷ୍ମୀ ପୂଜା…

ଦୀର୍ଘ ତିନି ଦଶନ୍ଧି ଧରି ଭୁବନେଶ୍ବର ୟୁନିଟ୍ ୩ ଠାରେ ଅନୁଷ୍ଠିତ ହୋଇଆସୁଥିବା ଗଜଲକ୍ଷ୍ମୀ ପୂଜାର ଏହା ହେଉଛି ୩୧ତମ ପୂଜା ଉତ୍ସବ | ଏଣୁ ଏହାକୁ ସହରର ଅନ୍ୟ ସମସ୍ତ ପୂଜା ଠାରୁ ନିଆରା ଢଙ୍ଗରେ ପାଳନ କରିବା ନିମନ୍ତେ ସଭିଏଁ ତତ୍ପର ହୋଇ ଉଠିଥିବା ବେଳେ ଗଜଲକ୍ଷ୍ମୀ ସାଂସ୍କୃତିକ ସଂଘ ଓ ଜୟ ଓଡିଶାର ମିଳିତ ଆନୁକୁଲ୍ୟରେ ଭିନ୍ନ ଭିନ୍ନ ଚିତାକର୍ଷକ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ଦେଖଣାହାରୀଙ୍କୁ ବାନ୍ଧି ରଖିଥିଲା।

ସାରା ଓଡିଶାରେ ପ୍ରଥମ ଥର ପାଇଁ, ମା’ ଙ୍କର ସମସ୍ତ ପୂଜାବିଧିକୁ ଅନୁସରଣ କରିବା ସହ ପୂଜା ମଣ୍ଡପରେ ମା’ ଙ୍କ ପୂଜା ସଙ୍ଗେସଙ୍ଗେ ଏକ ରକ୍ତଦାନ ଶିବିର ଆୟୋଜନ ସମାଜକୁ ଏକ ସଚେତନତାର ବାର୍ତ୍ତା ଦେବାରେ ସହାୟକ ହୋଇଛି। ଗତ ୧୭, ୧୯ ଓ ୨୧ ତିନିଦିନ ଧରି ବହୁ ସଂଖ୍ୟକ ବ୍ୟକ୍ତି ପହଂଚି ରକ୍ତଦାନ କରିଥିଲେ।

ଏହିବର୍ଷ ପୂଜାର ବିଷୟବସ୍ତୁ ମହିଳା ସୁରକ୍ଷା ଓ ସଶକ୍ତିକରଣ ରହିଥିବା ବେଳେ ଏହାକୁ ଆଧାର କରି ଏକ ସୁନ୍ଦର ମୁରୁଜ ପ୍ରତିଯୋଗୀତାର ଆୟୋଜନ କରାଯାଇଥିଲା। ଏହାସହିତ ମା’ ଙ୍କ ଦର୍ଶନ ନିମନ୍ତେ ଆସୁଥିବା ପ୍ରତ୍ୟେକ ମହିଳା ନିଜ ନିଜ ଘରର ଲକ୍ଷ୍ମୀ ହୋଇଥିବାରୁ ତାଙ୍କୁ ମଧ୍ୟ ପୂଜା କରାଯାଇଥିଲା।

ଜାତି, ଧର୍ମ ଓ ବର୍ଣ୍ଣ ନିର୍ବିଶେଷରେ ସମସ୍ତଙ୍କୁ ସାଂସ୍କୃତିକ କାର୍ଯ୍ୟକ୍ରମର ଅଂଶ କରିବା ହେଉଛି, ଜୟ ଓଡିଶାର ପ୍ରତିଷ୍ଠାତା ତଥା ଗଜଲକ୍ଷ୍ମୀ ସାଂସ୍କୃତିକ ସଂଘର ମୂଖ୍ୟ ଉପଦେଷ୍ଟା ଶ୍ରୀ ରୁଦ୍ର ନାରାୟଣ ସାମନ୍ତରାୟଙ୍କ ଉଦ୍ଦେଶ୍ୟ। ପୂଜାର ପ୍ରତି ସନ୍ଧ୍ୟାରେ ବିଭିନ୍ନ ନିଆରା କାର୍ଯ୍ୟକ୍ରମ ଆୟୋଜନ କରାଯାଇଥିଲା ଯେପରିକି, ଗୋଟିଏ ଦିନ ସାଂସ୍କୃତିକ ସନ୍ଧ୍ୟାରେ ବିଭିନ୍ନ ମହିଳା ସଂଗଠନ ଦ୍ଵାରା ସଙ୍କୀର୍ତନ, ସଙ୍ଗୀତ କାର୍ଯ୍ୟକ୍ରମ ଦର୍ଶକମାନଙ୍କ ମଧ୍ୟରେ ଆଧ୍ୟାତ୍ମିକ ଭାବ ଜାଗରଣ କରିଥିଲା। ସେହିଦିନ ମହିଳାମାନଙ୍କ ସୁରକ୍ଷା ନିମନ୍ତେ ‘ହର’ ଟିମ୍ ଦ୍ଵାରା ଏକ ତାଲିମ୍ କାର୍ଯ୍ୟକ୍ରମ ଆୟୋଜିତ ହେବା ସହ ପ୍ରତିଦିନ ୫ ଜଣ ମହିଳାଙ୍କୁ “ଶକ୍ତି ସମ୍ମାନ” ରେ ସମ୍ମାନିତ କରାଯାଇଥିଲା।

କାର୍ଯ୍ୟକ୍ରମର ଅନ୍ୟ ଏକ ସନ୍ଧ୍ୟା ବିଶେଷ ଭାବେ ବରିଷ୍ଠ ନାଗରିକମାନଙ୍କ ପାଇଁ ଉଦ୍ଧିଷ୍ଟ ଥିଲା। ସେହିଦିନ ବରିଷ୍ଠ ନାଗରିକମାନଙ୍କୁ ସଚେତନ କରିବା ନିମନ୍ତେ କମିଶନରେଟ ପୁଲିସ ଦ୍ଵାରା ଏକ “ସାଇବର କ୍ରାଇମ ଟକ୍” ଆୟୋଜନ କରାଯାଇଥିଲା ଓ ଲାଫଟର ବ୍ୟାୟାମ କରାଯାଇଥିଲା।
ଏହି କାର୍ଯ୍ୟକ୍ରମ ଅକ୍ଟୋବର ୨୩ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବା ସହ ପ୍ରତ୍ୟେକ ସନ୍ଧ୍ୟା ୬ଟାରୁ ୧୦ଟା ପର୍ଯ୍ୟନ୍ତ ବିଭିନ୍ନ ପ୍ରକାର ମନୋରଞ୍ଜନ ମୂଳକ ସାଂସ୍କୃତିକ କାର୍ଯ୍ୟକ୍ରମରେ ସାମିଲ ହେବା ସହ ରାଜଧାନୀ ବାସୀ ଗଜଲକ୍ଷ୍ମୀ ମା’ ଙ୍କ ଆଶିର୍ବାଦ ଲାଭ କରିଥିଲେ ।