ବଡଦାଣ୍ଡରେ ଗଡିବ ତିନି ରଥ….
ଶ୍ରୀକ୍ଷେତ୍ରରେ ଗଡିବ ମହାପ୍ରଭୁଙ୍କର ରଥ । ରଥାରୁଢ ହେବେ କାଳିଆ ଠାକୁର । ଚତୁର୍ଦ୍ଧାମୂର୍ତି ରଥରେ ଦେବେ ଦର୍ଶନ । ଯିବେ ମାଉସୀ ଘର । ବଡଦାଣ୍ଡରେ ତିନି ରଥ ଗଡିବା ନେଇ ଅନୁମତି ଦେଲେ ସୁପ୍ରିମ୍କୋର୍ଟ । କେବଳ ମହାପ୍ରଭୁଙ୍କ ମୂଳପୀଠ ପୁରୀରେ ରଥଯାତ୍ରା ପାଇଁ ମିଳିଲା ଅନୁମତି ।
୧୮ ତାରିଖ ରାୟର ପରିବର୍ତନ କରି ଏହି ରାୟ ଦେଲେ ସର୍ବୋଚ୍ଚ କୋର୍ଟ । ବିନା ଭକ୍ତରେ ରଥଯାତ୍ରା ପାଇଁ ମିଳିଲା ଅନୁମତି । କୋଭିଡ କଟକଣା ଭିତରେ ହେବ ରଥଯାତ୍ରା ।ଏହି କଟକଣା ରାଜ୍ୟସରକାର ଲଗାଇବେ ।
ରାଜ୍ୟସରକାର ଓ ଶ୍ରୀମନ୍ଦିର ପରିଚାଳନା କମିଟି ଉପରେ ଏହି ଦାୟିତ୍ୱ ଛାଡିଲେ ସୁପ୍ରିମକୋର୍ଟ । ଭକ୍ତଙ୍କ ଯୋଗଦାନ ଓ କୌଣସିପ୍ରକାର ଜନସମାଗମ ନ କରିବା ନେଇ ସୁପ୍ରିମକୋର୍ଟଙ୍କ ନିର୍ଦେଶ । ସୁପ୍ରିମକୋର୍ଟଙ୍କ ମୁଖ୍ୟ ବିଚାରପତି ଏ ଏସ ବୋବଡେଙ୍କ ଅଧ୍ୟକ୍ଷତାରେ ଗଠିତ ୩ ଜଣିଆ ଖଣ୍ଡପୀଠରେ ଏହି ରାୟ ପ୍ରକାଶ ପାଇଛି । ତେବେ ରଥ ଟାଣିପାରିବେନି ଭକ୍ତ । ସିଧାପ୍ରସାରଣ ଜରିଆରେ ଟିଭିରେ ମହାପ୍ରଭୁଙ୍କ ରଥଯାତ୍ରା ଦେଖିବେ ଭକ୍ତ ।
କିନ୍ତୁ ରଥଯାତ୍ରା ଯୋଗୁ ଯେପରି ସଂକ୍ରମଣ ନ ବ୍ୟାପିବ ତାହାକୁ ଦୃଷ୍ଟି ଦେବାକୁ ସୁପ୍ରିମକୋର୍ଟ ସର୍ତ୍ତ ରଖିଛନ୍ତି। ଫଳରେ କୋଭିଡ-୧୯ର ସମସ୍ତ ନିୟମକୁ କଡ଼ାକଡ଼ି ପାଳନ କରାଯାଇ ରଥଯାତ୍ରା କରାଯିବ ବୋଲି ସ୍ପଷ୍ଟ ହୋଇଛି।
ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟ୍ଟା, ପୂର୍ବତନ ସଲିସିଟର ଜେନେରାଲ ହରିଶ ସାଲ୍ଭେ, ମୋହନ ପରାସରନ ପ୍ରମୁଖ ବରିଷ୍ଠ ଓକିଲ ରଥଯାତ୍ରା ସପକ୍ଷରେ ମତ ଦେଇଥିଲେ। ହରିଶ ସାଲଭେ ଯୁକ୍ତିରେ କହିଥିଲେ, ପୁରୀରେ କର୍ଫ୍ୟୁ ଲାଗୁ କରିବୁ। କୋଭିଡ୍ ଟେଷ୍ଟ ହୋଇଥିବା ସେବାୟତମାନେ ରଥଯାତ୍ରାରେ ଅଂଶଗ୍ରହଣ କରିବେ। ସଂକ୍ରମଣ ଯେପରି ନ ବ୍ୟାପିବ ତାହାକୁ ଗୁରୁତ୍ଵ ଦେବା ରାଜ୍ୟ ସରକାରଙ୍କ ଦାୟିତ୍ଵ। କେନ୍ଦ୍ର ଓ ରାଜ୍ୟ ସରକାରଙ୍କ ଯୁକ୍ତି ଶୁଣିବା ପରେ ସର୍ବୋଚ୍ଚ ନ୍ୟାୟାଳୟ ପୁରୀରେ ରଥଯାତ୍ରା ପାଇଁ ଅନୁମତି ଦେଇଥିଲେ।
ସୂଚନା ଅନୁସାରେ, ଚଳିତବର୍ଷ ରଥଯାତ୍ରା ବନ୍ଦ କରାଯିବା ନେଇ ଗତ ୧୮ ତାରିଖରେ ସୁପ୍ରିମକୋର୍ଟ ଦେଇଥିବା ରାୟର ପୁନର୍ବିଚାର ଲାଗି ରିଟ୍ ପିଟିଶନ ଦାଖଲ ହୋଇଥିଲା। ଏଥିରେ କେନ୍ଦ୍ର ଏବଂ ରାଜ୍ୟ ସରକାର ପକ୍ଷଭୁକ୍ତ ହୋଇଥିଲେ। ସୋମବାର ପୂର୍ବାହ୍ନ ୧୧ଟା ପରେ ସୁପ୍ରିମକୋର୍ଟରେ ରିଟ୍ ପିଟିଶନର ଶୁଣାଣି ହେବା ସହିତ ରାଜ୍ୟ ଓ କେନ୍ଦ୍ର ସରକାର ନିଜର ଯୁକ୍ତି ଉପସ୍ଥାପନ କରିଥିଲେ। ଗଜପତି ମହାରାଜା ଦିବ୍ୟସିଂହ ଦେବଙ୍କ ପ୍ରସ୍ତାବ କ୍ରମେ ରଥଯାତ୍ରା କରିବାକୁ ରାଜ୍ୟ ସରକାର ସତ୍ୟପାଠ ଦାଖଲ କରିଥିଲେ। ରାଜ୍ୟ ସରକାରଙ୍କ ପକ୍ଷରୁ ରେସିଡେଣ୍ଟ କମିଶନର ସଞ୍ଜୀବ ମିଶ୍ର ଏହି ସତ୍ୟପାଠ ଦାଖଲ କରିଥିଲେ। ବିନା ଭକ୍ତରେ ରଥଯାତ୍ରା କରିବାକୁ ସତ୍ୟପାଠରେ ଦର୍ଶାଯାଇଥିଲା। ସେହିପରି କେନ୍ଦ୍ର ସରକାରଙ୍କ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ବିନା ଭକ୍ତରେ ରଥଯାତ୍ରା କରିବାକୁ ଯୁକ୍ତି ବାଢ଼ିଥିଲେ। ବର୍ଷ ବର୍ଷ ଧରି ହୋଇଆସୁଥିବା ରଥଯାତ୍ରାକୁ ବନ୍ଦ ନ କରିବାକୁ ସଲିସିଟର ଜେନେରାଲ କହିଥିଲେ। ରଥଯାତ୍ରାର ସିଧାପ୍ରସାରଣ କରିବାକୁ ତୁଷାର ମେହେଟ୍ଟା ପ୍ରସ୍ତାବ ଦେଇଥିଲେ। ଏହା ପରେ ଜଷ୍ଟିସ ଏସ. ରବୀନ୍ଦ୍ର ଭଟ୍ଟଙ୍କ ଜଣିକିଆ ଖଣ୍ଡପୀଠ ମାମଲାର ଶୁଣାଣି ପାଇଁ ୩ ଜଣିଆ ଖଣ୍ଡପୀଠକୁ ସ୍ଥାନାନ୍ତର କରିଥିଲେ। ପ୍ରଧାନ ବିଚାରପତି ଜଷ୍ଟିସ ଏସ.ଏ. ବୋବଡେ, ଜଷ୍ଟିସ ଦିନେଶ ମାହେଶ୍ଵରୀ, ଜଷ୍ଟିସ ଏ. ଏସ. ବୋପାନ୍ନାଙ୍କୁ ନେଇ ଗଠିତ ୩ ଜଣିଆ ଖଣ୍ଡପୀଠ ମାମଲାର ଶୁଶାଣି କରି ରଥଯାତ୍ରା ସମ୍ପନ୍ନ କରିବା ନେଇ ରାୟ ପ୍ରଦାନ କରିଥିଲେ।