ବିବାହ ଋତୁର ଚର୍ଚ୍ଚିତ ଦମ୍ପତି
ଦ୍ୱିତୀୟ ବିବାହ କିମ୍ବା ବିଳମ୍ବରେ ବିବାହର ସତେ ଯେପରି ଏକ ଋତୁ ଏବେ ଓଡ଼ିଶାରେ ଚାଲିଛି। ବିଶେଷ କରି ରାଜନେତା ଓ ଅଭିନେତା ଏହି ଦୌଡ଼ରେ ଆଗରେ ଅଛନ୍ତି। କିଏ ଦ୍ୱିତୀୟ ଇନିଙ୍ଗ୍ସ ଆରମ୍ଭ କରୁଛନ୍ତି ତ ପୁଣି କିଏ ଟିକେ ବିଳମ୍ବରେ ହେଉ ପଛେ ପ୍ରଥମ ଇନିଂସ ଆରମ୍ଭ କରିଛନ୍ତି।
ଅଭିନେତାରୁ ରାଜନେତା ବନିଥିବା ପୂର୍ବତନ ସାଂସଦ ତଥା ବିଜେପି ନେତା ଅନୁଭବ ମହାନ୍ତି ବହୁ ହାଇ ପ୍ରୋଫାଇଲ୍ ଡ୍ରାମା ଓ ବାଦ ବିବାଦ ପରେ ନିଜ ଦୀର୍ଘ ଦିନର ବାନ୍ଧବୀ ସାମ୍ବାଦିକା ଜାଗ୍ରତି ଶୁକ୍ଳାଙ୍କୁ ଦିଲ୍ଲୀରେ ବିବାହ କରିଛନ୍ତି। ଅଭିନେତ୍ରୀ ତଥା ପୂର୍ବତନ ପତ୍ନୀ ବର୍ଷା ପ୍ରିୟଦର୍ଶିନୀଙ୍କ ସହ ବିବାହ ବିଚ୍ଛେଦ ପରେ ଜାଗ୍ରତିଙ୍କ ହାତ ଧରିଛନ୍ତି ୪୩ ବର୍ଷୀୟ ଅନୁଭବ। ଏ ଦୁହିଁଙ୍କ ବିବାହ ଓ ପ୍ରେମ ସମ୍ପର୍କ ନେଇ ଅନେକ ଚର୍ଚ୍ଚା ଚାଲିଥିବା ବେଳେ ସବୁ ଚର୍ଚ୍ଚାରେ ଏବେ ପୂର୍ଣ୍ଣଚ୍ଛେଦ ପଡ଼ିଛି। ବିବାହ ପରେ ଏହି ଲଭ୍ ବାର୍ଡ ଏବେ ଓଡ଼ିଶା ଫେରିଛନ୍ତି।
ସେହିପରି ପାଇଲଟ ଚାକିରୀ ଛାଡ଼ି ରାଜନୀତିରେ ପ୍ରବେଶ କରିଥିବା ବରିଷ୍ଠ କଂଗ୍ରେସ୍ ନେତା ସୁର ରାଉତରାୟଙ୍କ ପୁଅ ମନ୍ମଥ ରାଉତରାୟ ମଧ୍ୟ ନିଜର ବିବାହ ବିଚ୍ଛେଦ ପରେ ନିକଟରେ ଦ୍ୱିତୀୟ ବିବାହ କରିଛନ୍ତି। ବିଜେଡି ଭୁବନେଶ୍ୱର ଲୋକସଭା ଆସନର ପ୍ରାର୍ଥୀ ୪୨ ବର୍ଷୀୟ ଶ୍ରୀ ରାଉତରାୟ ହେଉଛନ୍ତି ସୁର ବାବୁଙ୍କ ସାନ ପୁଅ। ରାଜନୀତିରେ ପ୍ରବେଶ କରିବା ସମୟରେ ହିଁ ତାଙ୍କ ବିବାହ ବିଚ୍ଛେଦ ମାମଲା ଚର୍ଚ୍ଚା ଜୋର ଧରିଥିଲା। ତେବେ ଆଇନ୍ଗତ ଭାବେ ନିଜ ପ୍ରଥମ ପତ୍ନୀଙ୍କ ସହ ଛାଡ଼ପତ୍ର ପରେ ବ୍ୟାଙ୍କର ରୋଜାଲିନ୍ ପଟ୍ଟନାୟକଙ୍କୁ ଭୁବନେଶ୍ୱର ଉପକଣ୍ଠ ଚନ୍ଦକାରେ ଏକ ରିଜର୍ଟରେ ପରିବାର ସଦସ୍ୟଙ୍କ ଗହଣରେ ଲୋ ପ୍ରୋଫାଇଲ୍ ବାହାଘରରେ ନିଜର ପତ୍ନୀ ଭାବେ ଗ୍ରହଣ କରିଛନ୍ତି ମନ୍ମଥ। ବାହାଘର ପରେ ମହପ୍ରଭୁ ଲିଙ୍ଗରାଜଙ୍କୁ ଦର୍ଶନ କରିବା ପରେ ନିଜ ବିବାହକୁ ନେଇ ବେଶ ଖୁସି ବ୍ୟକ୍ତ କରିଛନ୍ତି ଏହି ଦମ୍ପତି।
ମାହାଙ୍ଗାର ବିଧାୟକ ଶାରଦା ପ୍ରସାଦ ପ୍ରଧାନ ମଧ୍ୟ ଚଳିତ ମାସ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ୪୬ ବର୍ଷୀୟ ଶାରଦାଙ୍କର କିନ୍ତୁ ଏହା ହେଉଛି ପ୍ରଥମ ବିବାହ। ରାଜସ୍ଥାନର ଜୟପୁର ଠାରେ ଏକ ବିଳାସପୂର୍ଣ୍ଣ ହୋଟେଲ୍ରେ ୨୭ ବର୍ଷୀୟା ଟ୍ରେନି ଓଏଏସ୍ ଅଫିସର ସିପ୍ରା ପ୍ରିୟଦର୍ଶନୀ ବଳଙ୍କୁ ବିବାହ କରିଛନ୍ତି। ମାହାଙ୍ଗା ବିଧାୟକ ଚଳିତ ନିର୍ବାଚନରେ ପ୍ରଥମ ଥର ପାଇଁ ବିଧାନସଭାକୁ ନିର୍ବାଚିତ ହୋଇଛନ୍ତି। ତାଙ୍କ ପତ୍ନୀ ସିପ୍ରା ହେଉଛନ୍ତି କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକ୍ର ବାରିମୂଳ ଗ୍ରାମର ଝିଅ। ରେଭେନ୍ସା କଲେଜରୁ ବିଏସ୍ସି ଶିକ୍ଷା ସମାପ୍ତ କରିଥିବା ସିପ୍ରା ୨୦୨୩ ମସିହାରେ ହିଁ ଓଡ଼ିଶା ପ୍ରଶାସନିକ ସେବା ପରୀକ୍ଷାରେ କୃତକାର୍ଯ୍ୟ ହୋଇ ଚାକିରୀରେ ଯୋଗ ଦେଇଥିଲେ। ବିଳାସପୂର୍ଣ୍ଣ ବିବାହ ପରେ ବିଧାୟକ ଜଣକ ତାଙ୍କର ପତ୍ନୀଙ୍କୁ ଧରି ଓଡ଼ିଶା ଫେରିବା ସମୟରେ ତାଙ୍କ ସମର୍ଥକମାନେ ଭବ୍ୟ ସମ୍ବର୍ଦ୍ଧନା ଦେଇଥିଲେ।
ଏହି ବିବାହ ତାଲିକାରେ ଯୋଡ଼ି ହୋଇଥିବା ଆଉ ଜଣେ ରାଜନେତା ହେଉଛନ୍ତି ପୂର୍ବତନ ଲୋକସଭା ସାଂସଦ ତଥା ବିଜେଡି ନେତା ପ୍ରଦୀପ ମାଝୀ। ପ୍ରଦୀପ ସାମ୍ବାଦିକା ସୁଶ୍ରୀ ସଂଗୀତା ସାହୁଙ୍କୁ ସୁଦୂର ଗୋଆରେ ବିବାହ କରିଛନ୍ତି। ୪୯ ବର୍ଷୀୟ ପ୍ରଦୀପଙ୍କର ଏହା ହେଉଛି ପ୍ରଥମ ବିବାହ। ତାଙ୍କ ପତ୍ନୀ କିଛି ଖବର କାଗଜ ଓ ଟେଲିଭିଜନ ଚ୍ୟାନେଲ୍ରେ କାର୍ଯ୍ୟ କରିଛନ୍ତି। ପୂରା ଫିଲ୍ମି ଷ୍ଟାଇଲ୍ରେ ହଳଦୀ ଓ ମେହେନ୍ଦୀ ପରେ ବିବାହ କାର୍ଯ୍ୟ ସମ୍ପନ୍ନ ହୋଇଛି। ବାହାଘର ସମୟରେ ପରିବାରର କିଛି ସଦସ୍ୟ ଓ ନିକଟତମ ବନ୍ଧୁମାନେ ଉପସ୍ଥିତ ଥିଲେ। ୩ ବର୍ଷ ତଳେ ପ୍ରଦୀପଙ୍କର ସୁଶ୍ରୀଙ୍କ ସହ ଏକ ଜିମ୍ରେ ଭେଟ ହୋଇଥିଲା। ତା’ପରେ ବନ୍ଧୁ ଏବଂ ପରେ ପରେ ଦୁହିଁଙ୍କ ଭିତରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ବିବାହ ପରେ ପ୍ରଦୀପ ଖୁସି ବ୍ୟକ୍ତ କରିବା ସହ ପରିବାର ତରଫରୁ ମଧ୍ୟ ବିବାହ ପାଇଁ ଚାପ ପକାଯାଉଥିଲା ବୋଲି କହିଛନ୍ତି। ଆଦିବାସୀ ନେତା ପ୍ରଦୀପ ୨୦୦୯ରେ କଂଗ୍ରେସ ଟିକେଟରେ ଓଡ଼ିଶାର ନବରଙ୍ଗପୁର ଆସନରୁ ନିର୍ବାଚିତ ହୋଇଥିଲେ। ତେବେ ୨୦୨୧ରେ ସେ ବିଜୁ ଜନତା ଦଳରେ ଯୋଗ ଦେବା ସହ ୨୦୨୪ରେ ନବରଙ୍ଗପୁର ଆସନରୁ ବିଜେଡି ଟିକେଟରେ ନିର୍ବାଚନ ଲଢ଼ିଥିଲେ ମଧ୍ୟ ପରାସ୍ତ ହୋଇଥିଲେ।
ମାର୍ଚ୍ଚ ମାସରେ ଏହି ୪ ଜଣ ରାଜନେତାଙ୍କର ଚର୍ଚ୍ଚିତ ବିବାହ ଗଣମାଧ୍ୟମକୁ ଚର୍ଚ୍ଚାର ଖୋରାକ ଯୋଗାଇଥିବା ବେଳେ ଏହି ନବ ଦମ୍ପତିମାନଙ୍କୁ ହୋଲିର ଅଭିନନ୍ଦନ ସହ ସେମାନଙ୍କର ଜୀବନ ସୁଖମୟ ହେବା ନେଇ ଆମେ କାମନା କରୁଛୁ।